Leviticus 26

Mu Ramai a Ngava ne BAKOVI DAGI

(Vinara 7:12-24; 28:1-14)

1 ^aE BAKOVI DAGI i taki tabua e Moses, ge taki e huriki a Israel, ge ta maea, “Naha ni kau na kai na kedo a hanuna vure ranga, o mu gu bole a kedo dagi mu gu vakapesi, ge a vure ne mua mu gu turume na ngalana, a vuhuna iau e BAKOVI DAGI a Vure ne mua.

2“Naha ni leho na Parava Nimalo. Mu togoa a mailo nau. Iau e BAKOVI DAGI, a takia a ngava iea.

3 ^b“Mua bara mu ramai a vinara nau, mu rata a maki a ngaru mu gu rata, 4bara ratea a vala i boru, i rata a maki ni kani ri rike kamumu na malala ne mua. A maka kai bara ri vua kamumu. 5A maki ni kani bara ri bele kupo. Bara mu mirio mavonga a vit i harena na tahuna a vain i rara ni pasi. Bara mu pasi mavonga a kanena vain i rara, i harena na tahuna mu varo tabu a vit. Bara mu kani mu maru, mu made kamumu na malala ne mua.

6“Iau bara habi a nivalemu ne mua mu made kamumu. Na tahuna mu mahita, i uka ma mu gu mangenge vona tara maki. Ga lili vuroki a maka livoa hateka na robo ne mua. E huriki a pile i uka ma ri gi ratapile mua. 7Na tahuna mu vaubi turane huriki a pile, bara mu valili ne ria, mu ratapile ria. 8A bakovi i ala lima ne mua bara ri valili na pile ala ravulu mule ma murina balaka taku (100). A bakovi i ala ravulu mule ma murina balaka taku (100) ne mua bara ri valili na pile ala ravulu rangale (10,000), ri ratapile ria.

9“Iau bara rata kamumu mua, a habi ne mua e huriki e tune mua ri ala kupo. Bara vakatorea a ngava dagi a takia ne mua hosi. 10A maki ni kani mu mirio na pida muga, bara i tabuli i harena na pida muri. A maki mu kani kaleva, bara mu vuroki tala, mu bole a maki ni kani karaba, mu ru na murine ria. 11Iau ga made na mailo nau na kurukurune mua, i uka ma ga ngalahere ne mua. 12 ^cGa laho turane mua, ge iau a Vure ne mua, mua ge mua e huriki a tara nau. 13Iau e BAKOVI DAGI a Vure ne mua. Hosi mua a vorakato o Egipto ni vakavora hateka, muri a tuli tala mua vonga, a taparaki valai mua koea, lakea i uka ma ge mua a vorakato tabu ne ria. A ratapilea a nitora na bakovi i vakavora hateka mua, ngane mu laho na pesivahane mua.

A Vure Ge Vakamadihi e Huriki Ri Longotaro

14“Pali mua mu longotaro a ngavagu i uka ma mu ramai a vinara nau, 15mu putu puru a vinara nau, mu ngalahere na ngavagu, mu longotaro a ngava dagi a rata turane mua, 16bara vakamadihi mua maea: bara vakamangenge hateka mua, a habi a gilanga dagi ne mua, ra gilanga iea bara i rata a kuline mua i rongo, bara mu kepa, ge ratea a kakaine mua i malosi. Bara mu varo a maki ni kani na hania, pali i uka ma mu gu kani a kanena, a vuhuna e huriki a pile bara ri valai, ri kani a maki mu varo. 17Iau bara iau a pile ne mua. E huriki a pile bara ri valai, ri vaubi turane mua, ri ratapile mua, ri matakari mua. Na tahuna i uka viri ge valili ne mua, bara mu mangenge tavula mu ha.

18“Muri na tahuna a vakamadihi mua na naro nga, pali i uka ma mu ramai tabu a ngavagu, bara vakamadihi hateka mua. 19Bara ratapile a tagenga, a nitora ne mua. A vala i uka ma ge boru, a malala bara i tora manga a kedo. 20A maki ni kani i uka ma ri gi koru rike na hania, a maka kai i uka ma ri gi vua. A tuhakanga ne mua bara i lobo tavula.

21“Na tahuna a maka maregoa nga ri bele ne mua, pali mu tababana ni tagege, bara luhoi a maka naro hale mu rata, a habi mua a maregoa hale, i dagi hateka na maregoa muga. 22Ga rudu a maka livoa hateka ri gi lakene ri gi rabalaki e huriki e tune mua, a maka bulmakau ne mua, ga rata mua mu ala popote, i uka viri ge laho na dala ne mua.

23“Muri na tahuna a vakamadihi maea mua, i uka ma mu longototo a nitagu, mu tababana ni tagege, 24bara luhoi a naro hale ne mua, a ratapile mua hateka tabu. 25Mu ratapilea pali a ngava dagi, ngane ga rudu e huriki a pile ri gi vaubi turane mua. Na tahuna mu made pololilo na tanga dagi ni tura halui, mu luhoi ta mu made kamumu, pali bara rudua a gilanga dagi i ratapile mua. Na tahuna mu bole a maregoa na gilanga, bara habi mua na limane huriki a pile ne mua. 26Na tahuna iea bara vakaperemu mua na maki ni kani. A ngatavine ala ravulu bara ri vatunu vona a kanono i taku, ri gutu a maki ni kani popote. Muri bara mu vaveru, mu kani, pali i uka ma mu gu maru.

27“Muri na hini a rata a naro nga, pali mu tababana ni tagege mu longotaro a ngavagu, 28bara tahate hateka na naro hale mu rata, iau kunana a habi a nimadihi dagi hateka ne mua. 29Muri bara mu vitolo hateka, mu rabalaki mu kani e huriki e tune mua. 30Iau bara ratapile a maka roho na nivasileki na maka vure ne mua meli na lolo, bara puka a maka dede na havu mangisipa. Bara rabalaki mua, a voro rike a podane mua na hanuna vure a ratapile muga pali. Lakea bara marikoi hateka ne mua. 31Ga ratapile a tanga dagi, a roho na nivasileki ne mua. I uka ma ga ngaru a maka nihabi mu rata. 32Ga ratapile hatekea a malala ne mua. Na tahuna e huriki a pile ne mua ri bolea a malala iea ri made vona, bara ri turutu vona a maki i bele vona. 33Bara rata e huriki a pile ri vaubi turane mua, ri lili tala mua, mu vapida lae mu mariu lakea na maka tanga basi. A malala ne mua bara i tabuli tavula, a maka tanga dagi ne mua bara ni ratapile.

34“Na tahuna mu made na malala ne huriki a pile, a malala ne mua bara i tabuli tavula i malo. Muga na tahuna mu made vona a malala iea, i uka ma mu habi a nimalo vona a malala na poloruana pida ge ramai a ngava a taki. Pali na tahuna a malala i tabuli tavula, bara i malo kamumu.

36“Na tahuna mu made na robo ne huriki a pile, bara rata mua mu mangenge hateka. Bara mu longo tavulea a nangina vilu i ngalu a pagana kai, bara mu ha, i manga ni valili ne mua na tahuna na vabinga. Na tahuna mu ha, bara mu boru, mu ratapile lae mua na tahuna i uka viri ge valili ne mua. 37Bara mu boru langa, mu tabuli taho lae mua, i manga a viri i lele a bainat na vabinga, pali i uka viri ge valili mua na bainat. Na tahuna e huriki a pile ri ngaru ni vaubi turane mua, bara mu keri ni vaubi turane ria. 38Muri bara mu mate na robo ne huriki a pile, a malala ne ria bara i todo mua. 39E huriki ranga ne mua ri tababana na robo ne huriki a pile, bara i takutaku i bole a vuranga i lobo tavula, a vuhuna e huriki a gare ne mua ri rata a maka naro hale.

40“Pali muri e huriki ne mua bara ri taki tala a naro hale ne ria, ne huriki a gare ne ria, a vuhuna ra ri tagege ri longotaro a ngavagu. 41Mu tagege, lakea iau a vakamadihi mua, a rudu lakea mua na robo ne huriki a pile. Pali na tahuna e huriki a hamone mua ri hatakia pali a nimadihi na naro hale, ri pulo a vilone ria ri duku. 42 ^dMuri bara luhoi mulea a ngava dagi a ratea turana e Iakop, e Isak, e Abraham, ga luhoi mulea a malala e Kenan. 43Pali muga mu pe purua a malala ge malo na pida ge kupo, ge bole a murina a maka pida i uka ma mu ru a malona a malala ge malo. Mu bole a nimadihi na naro hale mu rata, na hini mu ngalahere na maka vinara mu longotaro a ngavagu. 44Na tahuna mu made na robo ne huriki a pile, i uka ma ga pe puru mua liu, o ga ratapile lobo mua. Ma ga rata mavonga, a ngava dagi a rata turane mua bara i lobo tavula. Iau e BAKOVI DAGI a Vure ne mua, i uka ma ga ratea a naro maea. 45Ga luhoi mua, ga luhoi tabua a ngava dagi a ratea ne huriki e tubune mua. A vakasiri a nitora dagi nau na maka tanga lobo, na tahuna a tuli tala ria na robo e Egipto, a taparaki valai ria koea. A bole valai ria nau, ge iau a Vure ne ria. Iau e BAKOVI DAGI, a takia a ngava iea.”

46A vinara nga e BAKOVI DAGI i habi ne Moses na lolo e Sinai, ge ramai e huriki a Israel.